Прэсавы сакратар Міністэрства замежных спраў Беларусі Андрэй Савіных пракамэнтаваў для Радыё Свабода рэзалюцыю Парламенцкай асамблеі Рады Еўропы ад 29 красавіка.
А.Савіных заявіў:

"Першае знаёмства з тэкстам пакідае адчуванне, што гэты дакумент быў прыняты імпульсіўна, пад уплывам выпадковых фактараў ці ваганняў палітычнай каньюнктуры. ПАРЕ кажа пра сваю прыхільнасць да дыялогу з Беларуссю і тут жа прымае рашэнне прыпыніць усе кантакты. У гэтай сітуацыі пазіцыя беларускага боку выглядае больш паслядоўнай. Мы разглядаем дыялог як сродак вырашэння ўсіх наяўных пытанняў і дасягнення ўзаемаразумення, і разлічваем, што нашы партнёры таксама прыйдуць да такой высновы".

Нагадаем, ПАРЕ прыняла рашэнне прыпыніць кантакты на высокім узроўні з парламентам і структурамі ўраду Беларусі, канстатаваўшы "адсутнасьць прагрэсу" на шляху да стандартаў Рады Еўропы і "адсутнасць палітычнай волі" з боку ўладаў адносна прыняцця каштоўнасцей арганізацыі.

Асамблея нагадала, што яна, як і раней, гатовая ўступіць у паступальны дыялог з беларускімі ўладамі "ў адказ на пазітыўныя зрухі", але яшчэ раз падкрэсьліла, што "дыялёг можа падтрымлівацца толькі на шляху няспыннага руху Беларусі да стандартаў Рады Еўропы".

У рэзалюцыі, якая прынятая на падставе дакладу Сінікі Хурскайнэн (Фінляндыя), парламентары нагадалі аб прапанове, зробленай ПАРЕ ў мінулым годзе, пра аднаўленне статусу спецыяльна запрошанага для парламенту Беларусі пры ўмове, што будзе ўведзены мараторый на смяротнае пакаранне.