Пасольства ЗША ў Беларусі выказала занепакоенасць прысудам, вынесеным Вярхоўным судом па "справе Аўтуховіча" шостага траўня. "Існуюць прычыны сумнявацца ў належным правядзенні гэтага працэсу ў тым, што тычыцца грамадзянскіх правоў Мікалая Аўтуховіча і астатніх удзельнікаў працэсу", - гаворыцца ў афіцыйнай заяве пасольства.
"У дадзеным і іншых выпадках мы ўвесь час падкрэслівалі беларускім уладам важнасць выканання належнай прававой працэдуры, - цытуе дакумент БелаПАН. - Мы спадзяваліся, што беларускія ўлады выкарыстоўваюць гэтую магчымасць, каб прадэманстраваць выкананне належнай прававой працэдуры і незалежнасць судовай сістэмы".

Пасольства ЗША заявіла, што "паляпшэнне адносінаў Злучаных Штатаў Амерыкі з Беларуссю можа адбыцца толькі тады, калі беларускія ўлады прадэманструюць большую павагу асноўных правоў чалавека".

Як раней паведамляў Тэлеграф, суд прысудзіў Мікалая Аўтуховіча да пяці гадоў і двух месяцам пазбаўлення волі ў калоніі строгага рэжыму, Уладзіміра Асіпенку - да трох гадоў пазбаўлення волі ў калоніі агульнага рэжыму, а Аляксандра Ларына - да трох гадоў пазбаўлення волі ў калоніі ўзмоцненага рэжыму. Яшчэ адзін абвінавачваны па справе - падпалкоўнік міліцыі Міхаіл Казлоў атрымаў два гады пазбаўлення волі ў калоніі агульнага рэжыму.