Латышскія парламентарыі зацікавіліся беларускім падыходам да фарміравання ў краіне заканадаўчай базы. Пра гэта заявіў старшыня камісіі сейма па міжнародных справах Андрыс Берзіньш 17 мая ў Мінску на сустрэчы са старшынёй камісіі па эканоміцы, бюджэце і фінансах Савета Рэспублікі Нацыянальнага сходу Беларусі Вадзімам Паповым.

Андрыс Берзіньш узначальвае парламенцкую дэлегацыю, у склад якой уваходзяць члены групы па супрацоўніцтве з Нацыянальным сходам Беларусі.

Паводле слоў кіраўніка дэлегацыі, латышскіх заканадаўцаў зацікавіла ў першую чаргу тое, што Канстытуцыйны суд Беларусі аналізуе праекты законаў перш, чым парламент іх прымае. "Наш Канстытуцыйны суд ад гэтага адхрышчваецца і гаворыць: "Мы разгледзім толькі ўжо прынятыя дакументы на прадмет іх адпаведнасці або неадпаведнасці Канстытуцыі", — расказаў Андрыс Берзіньш.

Латышскія парламентарыі станоўча ацанілі права прэзідэнта Беларусі ў мэтах аператыўнага рэагавання на змяненне сітуацыі выдаваць часовыя дэкрэты, якія затым на працягу трох дзён павінны накіроўвацца ў Нацыянальны сход для надання ім законнай сілы. Паводле слоў Андрыса Берзіньша, у Латвіі такой магчымасці цяпер няма. Праўда, нешта падобнае існавала два гады таму, калі Канстытуцыя дазваляла ўраду прымаць законы ў экстранным парадку ў перыяд парламенцкіх канікул.

Падчас гутаркі з латышскімі калегамі Вадзім Папоў выказаў надзею на працяг "паляпшэння ўзаемадзеяння" паміж дзвюма краінамі. "Да гэтага нас падштурхоўваюць і пытанні развіцця эканомікі нашых дзяржаў, і наша суседства", — адзначыў ён. "Інакш немагчыма. Бо суседзяў не выбіраюць. Яны дадзены Усявышнім, і дзякуй Богу, што ў нас такія суседзі, якія разумеюць нас і якіх разумеем мы", — сказаў ён.