Кіраўніцтва Савета Еўропы асудзіла вынясенне яшчэ двух смяротных прыгавораў у Беларусі.
Як раней паведамляў БелаПАН, 14 мая Гродзенскі абласны суд прыгаварыў да вышэйшай меры пакарання двух жыхароў Гродна. Яны прызнаныя вінаватымі ў забойстве з асаблівай жорсткасцю трох чалавек, разбоі з нанясеннем цяжкіх цялесных пашкоджанняў, наўмысным пашкоджанні маёмасці і выкраданні малалетняга. Прыгавор яшчэ не ўвайшоў у законную сілу і можа быць абскарджаны ў Вярхоўным судзе на працягу 10 сутак.
"Гэтыя прыгаворы сведчаць пра неабходнасць тэрмінова аб'явіць мараторый на смяротную кару, — заявіў генеральны сакратар Савета Еўропы Турбьёрн Ягланд. — Прымяненне смяротнай кары па-ранейшаму з'яўляецца галоўнай перашкодай у адносінах Беларусі з Саветам Еўропы. Мы гатовы аказаць садзеянне ў вырашэнні гэтага пытання і дапамагчы Беларусі стаць бліжэй да стандартаў Савета Еўропы ў сферы правоў чалавека".
Адмяніць нядаўнія смяротныя прыгаворы афіцыйны Мінск таксама заклікалі старшыня Камітэта міністраў Савета Еўропы Антоніо Мілашоскі і кіраўнік Парламенцкай асамблеі Савета Еўропы (ПАСЕ) Меўлют Чавушаглу, паведамілі БелаПАН у прэс-службе СЕ.
"Мы заклікаем прэзідэнта Лукашэнку неадкладна адмяніць два смяротныя прыгаворы, неадкладна ўвесці мараторый на смяротную кару і замяніць усе смяротныя прыгаворы на іншыя віды пакарання, каб наблізіць Беларусь да стандартаў Савета Еўропы, — гаворыцца ў сумеснай заяве Мілашоскі і Чавушаглу. — Прымяненню смяротнай кары няма месца ў пенітэнцыярнай сістэме сучаснага грамадства. Гатоўнасць неадкладна аб'явіць мараторый на смяротную кару і яе далейшая адмена з'яўляюцца найважнейшай умовай для ўступлення ў СЕ".
Беларусь — адзіная краіна ў Еўропе, у якой дагэтуль прымяняецца смяротная кара. У чэрвені 2009 года ПАСЕ прыняла рэзалюцыю аб вяртанні беларускаму парламенту статусу спецыяльнага запрошанага ў асамблеі пры ўмове ўвядзення ў краіне мараторыя на смяротную кару. Да ўвядзення мараторыя таксама заклікае Еўрасаюз. Гэта з'яўляецца адной з умоў адмены візавых санкцый у дачыненні да беларускіх чыноўнікаў, якія ЕС прадоўжыў да кастрычніка 2010 года.
29 красавіка 2010 года ПАСЕ прыпыніла кантакты з Беларуссю на высокім узроўні ў сувязі з "недастатковым прагрэсам" краіны ў сферы адпаведнасці стандартам Савета Еўропы. Прычынай такога рашэння стала прывядзенне ў выкананне двух смяротных прыгавораў у дачыненні да 25-гадовага Андрэя Жука і 30-гадовага Васіля Юзэпчука. Яны былі расстраляныя ў сакавіку, нягледзячы на тое, што іх скаргі знаходзіліся на разглядзе ў Камітэце ААН па правах чалавека.
