Адмена ЗША санкцый у адносінах да беларускіх прадпрыемстваў дасць штуршок да канструктыўнага і сістэмнага дыялогу з амерыканскім бокам. Пра гэта заявіў прэсавы сакратар МЗС Беларусі Андрэй Савіных.

"Што да падаўжэння мараторыю на ўжыванне санкцый у дачыненні да двух нашых прадпрыемстваў, мы разглядаем гэта як рашэнне ў правільным кірунку. Перад двума партнёрамі стаіць задача па расстыкоўцы тых завалаў, якія ўзніклі ў двухбаковых адносінах у мінулыя гады", — сказаў Андрэй Савіных.

Паводле Савіных, Беларусь канструктыўна падыходзіць да гэтай праблемы і гатовая да сур'ёзнага дыялогу з ЗША. "Перакананыя, што мы маглі б шмат зрабіць у інтарэсах дзвюх дзяржаў, і лічым, што адмена санкцый у прынцыпе з'яўляецца важнай умовай для пачатку такога дыялогу", — падкрэсліў прэсавы сакратар МЗС.

У лістападзе 2007 году ЗША ўвялі эканамічныя санкцыі ў дачыненні да канцэрну "Белнафтахім" у сувязі з парушэннямі правоў чалавека ў Беларусі, а ў сакавіку 2008 году — да ўсіх прадпрыемстваў "Белнафтахіму".

У верасні 2008 году ў дачыненні да двух ААТ — "Лакафарба" і "Полацк-Шкловалакно" Мінфін ЗША на паўгода змякчыў санкцыі. У лютым 2009 году дзеянне гэтага рашэння было падоўжанае да 1 чэрвеня, затым — да 30 лістапада 2009 году.

Днямі змякчэнне санкцый у дачыненні да двух згаданых прадпрыемстваў "Белнафтахіму" зноў было падоўжанае на паўгода — да 30 лістапада 2010 году.