Дакладчык Парламенцкай асамблеі Савета Еўропы (ПАСЕ) па Беларусі Сініка Хурскайнен заклікала беларускія ўлады правесці поўнае і празрыстае расследаванне прычын смерці журналіста Алега Бябеніна. Як паведамілі БелаПАН у прэс-службе ПАСЕ, пра гэта гаворыцца ў спецыяльнай заяве дакладчыка.

Хурскайнен адзначыла, што ПАСЕ будзе пільна сачыць за ходам расследавання і за ўсімі падзеямі, якія адбываюцца ў Беларусі напярэдадні прэзідэнцкіх выбараў. "Асабліва гэта тычыцца свабоды прэсы і свабоды палітычных правоў грамадзян", — падкрэсліла яна.

Дакладчык ПАСЕ выказала глыбокае спачуванне сям'і і блізкім Бябеніна.

Як паведамлялася раней, цела Бябеніна было знойдзена ў 19.00 3 верасня ў дачным доме ў Дзяржынскім раёне. Экспертыза ўстанавіла, што прычынай смерці журналіста з'яўляецца асфіксія з прычыны ўдушэння пятлёй пры павешанні, паведаміў БелаПАН пракурор Дзяржынскага раёна Сяргей Каўрыгін.