Рух “За свабоду” і “Офіс за дэмакратычную Беларусь” просяць міністраў краін ЕС знізіць кошты Шэнгенскіх віз
Рух “За Свабоду” і “Офіс за дэмакратычную Беларусь” (Брусель) накіравалі лісты ва ўсе краіны, што падпісалі Шэнгенскую дамову, з просьбай перагледзець палітыку ў дачыненні коштаў на візы для беларускіх грамадзян і працэдуру іх атрымання.
Звяртаючыся да міністраў замежных і ўнутраных спраў гэтых краін, а таксама да некаторых кіраўнікоў дзяржаў, лідэр Руху “За свабоду” Аляксандр Мілінкевіч і кіраўніца “Офісу за дэмакратычную Беларусь” Вольга Стужынская кажуць пра перашкоды, з якімі беларусы сутыкаюцца, калі спрабуюць атрымаць візы ў амбасадах краін ЕС пасля пашырэння Шэнгенскай зоны. “Падвышэнне консульскага збору і ўскладненне працэдуры атрымання выклікалі моцнае зніжэнне колькасці выдадзеных беларускім грамадзянам Шэнгенскіх віз”, – гаворыцца ў лісце. “Такая сітуацыя спараджае пачуццё ізаляцыі і пагаршае імідж ЕС сярод беларусаў. Цяперашняя візавая палітыка, – пішуць аўтары ліста, – супярэчыць намеру Еўрасаюза пашырыць кантакты з беларускім грамадствам і дапамагае тым сілам, якія сцвярджаюць, што ЕС “няма ніякай справы да Беларусі”.
Рух “За Свабоду” і “Офіс за дэмакратычную Беларусь” вераць, што палітыка краін-сяброў ЕС у візавым пытанні дачынна Беларусі стане адным з важных фактараў для будучыні краіны і нашага народу. Так, у супольным звароце спадар Мілінкевіч і спадарыня Стужынская просяць падтрымаць прапанову вышаградскай групы знізіць кошт Шэнгенскай візы ў аднабаковым парадку. Аўтары звароту таксама выражаюць спадзяванне, што візавае пытанне атрымае належную ўвагу падчас будучага прэзідэнцтва Чэхіі ў Еўрасаюзе, што ў выніку прывядзе да спрашчэння працэдуры атрымання Шэнгенскіх віз грамадзянамі Беларусі.
Падтрымайце кампанію Еўрапарламента за больш танныя візы для беларускіх грамадзян!
Кампанія, распачатая еўрапейскімі дэпутатамі Генавефай Грабоўскай (Польшча), Юстасам Палецкісам (Літва) і 
Ханэсам Свобадам (Аўстрыя) пад лозунгам “Say YES to Cheaper Visas for Belarusians” (“Скажы “ТАК” таннейшым візам для беларусаў”), набывае папулярнасць як у самім Еўрапарламенце, так і сярод нашых суайчыннікаў. На 21 лютага было сабрана больш за 80 подпісаў сяброў ЕП пад Дэкларацыяй № 12, якая прапануе знізіць кошт Шэнгенскіх віз для беларускіх грамадзян. Калі подпісаў будзе больш за 391, дэкларацыя накіруецца для разгляду ў Раду Еўразвязу і Еўракамісію.
"Офіс за дэмакратычную Беларусь” актыўна падтрымаў гэту ініцыятыву, зладзіўшы збор подпісаў у падтрымку кампаніі сярод беларускіх грамадскіх арганізацый, палітычных партый і медыя асацыяцый. Падчас парламенцкай сесіі ў Страсбуры, што праходзіла 18-21 лютага, супрацоўнікі Офіса інфармавалі еўрадэпутатаў пра высокія кошты Шэнгенскіх віз для беларускіх грамадзян і складаную працэдуру іх атрымання.
Многія парламентарыі шчыра здзіўляліся, калі даведваліся, што сума, якую вымушаны плаціць беларусы за аднаразовую візу, складае амаль траціну месячнага заробку ў краіне.
У часе інфармацыйнай кампаніі сярод дэпутатаў распаўсюджваліся ўлёткі з заклікам падпісаць Дэкларацыю № 12, у будынку Еўрапарламента былі таксама размешчаны плакаты з прапановай падтрымаць беларусаў. (Фота з акцыі і ўзор плаката можна паглядзець ніжэй)
На дадзены момант (24.04.2008) 156 дэпутатаў Еўрапарламента падпісалі дэкларацыю № 12.
Зварот "Офіса за дэмакратычную Беларусь" да палітычных партый, грамадзянскай супольнасці і незалежных СМІ Беларусі.
Шаноўныя прадстаўнікі палітычных партый, грамадскіх арганізацый і незалежных медыя асацыяцый,
Звяртаемся да вас з прапановай падтрымаць кампанію, распачатую ў Еўрапейскім Парламенце трыма прадстаўнікамі гэтай структуры—Генавефай Грабоўскай (Польшча), Юстасам Палецкісам (Летува) і Ханэсам Свобадам (Аўстрыя), і накіраванай на зніжэнне коштаў Шэнгенскіх віз для грамадзян Беларусі. Беларусь з’яўляецца адзінай краінай Усходняй Еўропы, што не мае спрошчанага візавага рэжыму з ЕЗ.
Паколькі таннейшыя візы і прасцейшая працэдура іх атрымання ёсць прамым інтарэсам нас з вамі і нашых суайчыннікаў, а таксама разумеючы важнасць кантактаў паміж нашымі грамадзянамі і грамадзянамі іншых краін Заходняй Еўропы, мы з вамі павінны ўзяць як мага больш актыўны ўдзел ў прасоўванні кампаніі, ініцыяванай еўрапарламентарамі.
“Офіс за Дэмакратычную Беларусь” у Бруселі бузе накіроўваць лісты да прадстаўнікоў розных палітычных груп у ЕП з просьбай падпісаць дэкларацыю. З такой жа мэтай мы плануем наладжваць акцыі падчас парламенцкіх сесій у Страсбуры.
Важнай умовай поспеху з’яўляецца моцны сігнал з Беларусі, як пацверджанне неабходнасці разгляду візавага пытання Еўразвязам і зніжэння верагоднасці далейшай ізаляцыі насельніцтва краіны. Таму мы заклікаем вас далучыцца да лабіравання праблемы!!
Калі вы падтрымліваеце ініцыятыву па зборы подпісаў, калі ласка, дашліце нам паведамленне ад імя вашай арганізацыі з указаннем назвы групоўкі і прозвішчам кіраўніка. Ваш голас будзе перададзены арганізатарам акцыі і падвысіць шанцы на атрыманне 392 подпісаў, патрэбных для таго, каб дэкларацыя была дасланая на разгляд ў Раду Еўразвязу.
З павагай,
Вольга Стужынская
