4-7 чэрвеня ў Мінску прайшла 6-ая спецыялізаваная міжнародная выстава “Дызайн-фармат”. Выстава ладзілася з ініцыятывы экспазіцыйнага цэнтра Белэкспа пры падтрымцы Беларускага саюза дызайнераў.

Гэты праект накіраваны на адлюстраванне рынку дызайн-паслуг у Беларусі. У рамках выставы выстаўляліся як працы асобных індывідуальныя дызайнераў, так і цэлых дызайнерскіх бюро і навучальных ўстаноў, дзе адбываецца падрыхтоўка па профільных ці памежных з дызайнам спецыяльнасцях.

Сёлетняя “Дызайн-фармат” прымеркаваная да 20-годдзя грамадскага аб’яднання “Беларускі саюз дызайнераў”. У часе экспазіцыі былі паказаныя творчыя праекты больш як 30 вядучых беларускіх дызайнераў, якія працуюць у галіне прамысловага дызайну, рэкламы, графікі, інтэр’еру.

Беларускі Саюз дызайнераў не абышоў увагай такую значную падзею як 130-годдзе з дня нараджэння мастака Казіміра Малевіча. Да юбілею сусветна вядомага дзеяча мастацтва ў рамках мерапрыемства былі прымеркаваныя выстава “Казімір Малевіч. 130”, мастацкія акцыі, адбыўся круглы стол. Спецыяльным госцем “Дызайн-фармат” 2008 быў мастацтвазнаўца, дырэктар Музея сучаснага рускага мастацтва ў Нью Джэрсі Аляксандар Глейзер.