Міністэрства фінансаў ЗША ў чарговы раз працягнула рашэнне аб змякчэнні санкцый у дачыненні да двух беларускіх прадпрыемстваў канцэрна "Белнафтахім" - ААТ "Лакафарба" і "Полацк-Шкловалакно". У той жа час ўласнасць ААТ "Лакафарба" і "Полацк-Шкловалакно" на тэрыторыі ЗША застаецца заблакаваная згодна з урадавым распараджэннем № 13405. Грамадзянам ЗША забаронена праз або пры пасрэдніцтве гэтых двух прадпрыемстваў купляць прадукцыю, паслугі і тэхналогіі ў іншых суб'ектаў гаспадарання, унесеных у спіс (маецца на ўвазе спіс прадпрыемстваў "Белнафтахіма", у дачыненні якіх санкцыі дзейнічаюць у цяперашні час).
Спецыяльны дакладчык ПАРЕ па Беларусі Сініка Хурскайнэн прыбыла ў Мінск з афіцыйным візітам. Сініка Хурскайнэн паведаміла, што падчас цяперашняга візіту яна хацела б даведацца аб тых кроках, якія зрабіла Беларусь для аднаўлення больш цеснага супрацоўніцтва з ПАРЕ (у прыватнасці, гаворка ідзе аб адмене смяротнага пакарання).
8–9 ліпеня камісар па пытаннях пашырэння ЕС і Еўрапейскай палітыкі добрасуседства Штэфан Фюле наведае Мінск.
Мытны саюз Беларусі, Расіі і Казахстана выклікае ў Еўрапейскім саюзе пэўную заклапочанасць. Пра гэта 16 чэрвеня заявіла ў Страсбургу высокая прадстаўніца ЕС па знешняй палітыцы і бяспецы Кэтрын Эштан, выступаючы перад дэпутатамі Еўрапарламента.
Старшыня Еўрапейскага парламента Ежы Бузек у заяве заклікаў беларускія ўлады "неадкладна спыніць рэпрэсіі і пераслед структур грамадзянскай супольнасці і вярнуцца на шлях дэмакратызацыі". Бузек выказаў "сур'ёзную занепакоенасць пагаршэннем сітуацыі з правамі чалавека ў Беларусі" ў сувязі з "апошнімі паведамленнямі пра рэпрэсіі і пераслед структур грамадзянскай супольнасці".
Кіраўніцтва Савета Еўропы асудзіла вынясенне яшчэ двух смяротных прыгавораў у Беларусі. "Прымяненне смяротнай кары па-ранейшаму з'яўляецца галоўнай перашкодай у адносінах Беларусі з Саветам Еўропы. Мы гатовы аказаць садзеянне ў вырашэнні гэтага пытання і дапамагчы Беларусі стаць бліжэй да стандартаў Савета Еўропы ў сферы правоў чалавека"-заявіў генеральны сакратар Савета Еўропы Турбьёрн Ягланд.
Латышскія парламентарыі зацікавіліся беларускім падыходам да фарміравання ў краіне заканадаўчай базы. Пра гэта заявіў старшыня камісіі сейма па міжнародных справах Андрыс Берзіньш 17 мая ў Мінску на сустрэчы са старшынёй камісіі па эканоміцы, бюджэце і фінансах Савета Рэспублікі Нацыянальнага сходу Беларусі Вадзімам Паповым.
