“Офіс за дэмакратычную Беларусь” у Бруселі – гэта грамадская арганізацыя, заснаваная беларусамі, якія жывуць за мяжой, з мэтай умацавання сувязей паміж беларускімі дэмакратычнымі ўтварэннямі, улучаючы грамадскія арганізацыі, палітычныя партыі, незалежныя медыа, з аднаго боку – і інстытутамі Еўразвязу, Радай Еўропы, НАТА, ААН, міжнароднымі праваахоўнымі арганізацыямі і міжнародным друкам – з іншага.   

Структура арганізацыі
Дзейнасць Офіса каардынуецца выканаўчым камітэтам. Міжнародны кансорцыум ажыццяўляе падтрымку некаторых праектаў, а таксама спрыяе развіццю інфармацыйных і камунікатыўных сетак.  
Сябры міжнароднага кансорцыуму і партнёрскія арганізацыі ОДБ па-за межамі Беларусі:
·         Alfred Mozer Stichting (Нидерланды): http://www.alfredmozerstichting.nl
·         Eastern Europe Studies Centre (Литва): http://www.eesc.lt/en
·         Hanse-Office, Joint Representation of Hamburg and Schleswig-Holstein to the European Union (Германия): http://www.hanse-office.de/
·         People in Need (Чехия): http://www.clovekvtisni.cz
·         Pontis Foundation (Словакия): http://www.nadaciapontis.sk
·         Robert Bosch Stiftung (Германия): http://www.bosch-stiftung.de
·         Silba (Дания): http://www.silba.dk

Галоўныя накірункі дзейнасці і планы на 2008 год

Дзякуючы працы “Офіса за дэмакратычную Беларусь” сталася магчымай актыўная лабісцкая дзейнасць. Супрацоўнікі Офіса ажыццяўляюць шматлікія кансультацыі з прадстаўнікамі Еўрапейская Парламента, Еўракамісіяй, Радай Еўропы ды іншымі арганізацыямі. Офіс арганізуе рэгулярныя візіты актывістаў грамадзянскай супольнасці Беларусі і дэмакратычных палітычных партый у Брусель, Страсбур і іншыя важныя гарады Еўразвязу дзеля таго, каб павялічыць зацікаўленасць беларускім пытаннем, стварыўшы магчымасць для асабістага непасрэднага абмену інфармацыяй паміж двума бакамі.  
“Офіс за дэмакратычную Беларусь” перыядычна з’яўляецца ініцыятарам і арганізатарам круглых сталоў, канферэнцый і форумаў па беларускім пытанні. Як частку інфармацыйнай працы ОДБ выдае англамоўны бюлетэнь «Belarus Headlines», які выходзіць у электронным фармаце раз на два тыдні. Бюлетэнь для беларускіх чытачоў “Навіны для Беларусі” распаўсюджваецца са з’яўленнем адпаведнага матэрыялу па ЕЗ і Беларусі. Падпісацца на бюлетэнь можна праз наш сайт, альбо даслаўшы запыт сеціўнай поштай. Усе нумары абодвух выданняў можна знайсці на сайце нашай арганізацыі ці ў Інтэрнэт-бібліятэцы “Камунікат” http://kamunikat.net.iig.pl/).
Дзякуючы актыўнай падтрымцы нямецкага фонду  Robert Bosch Stiftung і з дапамогай іншых партнёраў Офіс займаецца праектамі, накіраванымі на прасоўванне беларускай культуры ў Заходняй Еўропе. Арганізацыя выстаў і тэатральных паказаў, вечарын беларускага кіно, літаратурных чытанняў і канцэртаў беларускіх гуртоў склалі культурную праграму Офісу ў 2007 г. і будуць працягнутыя ў 2008-м.  Больш падрабязную інфармацыю пра праведзеныя і запланаваныя мерапрыемствы можна знайсці ў раздзелах  “Нашы праекты” і “Cultural review” (англамоўнай версіі сайта).
Адным з важных накірункаў дзейнасці Офіса ў 2008 г. стане арганізацыя адукацыйных семінараў для актывістаў грамадзянскай супольнасці і палітычных партый з мэтай атрымання імі каштоўнай і падрабязнай інфармацыі пра Еўразвяз і яго структуру, працэсы прыняцця рашэнняў, а таксама пра супрацоўніцтва паміж ЕЗ і Беларуссю ў розных сферах.
У часе рэалізацыі праектаў ОДБ традыцыйна надае вялікую ўвагу актыўнаму ўдзелу моладзі і жанчын, разумеючы важнасць узмацнення ўплыву гэтых груп на палітычныя працэсы ў Беларусі. Акрамя супрацоўніцтва з суполкамі, якія знаходзяцца ў нашай краіне, Офіс кантактуе з маладымі беларусамі, якія жывуць у ЕЗ, спрыяючы іх аб’яднанню і прыцягваючы да рэалізацыі беларускіх праектаў.